. . 1 . .
أهلا بيكى
مرحب بيكى
فى دنياى
وان شاالله المحبة تدوم
وتبفالنا هداوة بال
وتقدلى فى العديل والزين
وتدينى الفرح شبال
وان شاالله اغلبك مال
وانتى تغلبى . . بالاطفال
. . 2 . .
ليا سنين بفتش ليك
وكم شرقت
كم غربت
يرمينى الطريق لطريق
ويسرح بى بحر لبحر
عشان اوصل الى عينيك
عشان تدينى عمرى الفات
عشان اديكى عمرى الجاى
كم سولت . . ما خليت
واتاريك كنت ديمة معاى
مهاجرة . . وساكنه فى جواى
بنية تقول تقاسيم ناى
وجيه رايق
وبال فايق
وحاجب متكى فوق عينين فرايحية
بنادى عليا
مكتوب ليا عيدية
. . 3 . .
واجيكى الليلة محتاج ليكى
متعب . . من عذاب الفات
وياما قبلك شفت الويل
وياما قبلك قالوا مات
اجيكى الليلة داير أنسى
وداير ألقى فيك الذات
. . 4 . .
ودايرك تبقى لى صدرا
عليه اخت رحالى . . وارتاح
فترت خلاس من السوليت
وما داير سواك . . رباح
كفاية أشوف خلال عينيك
كل الدنيا نور . . وصباح
( اهداء للابن محمد عيد واتمنى ان يعثر على نصفه الحلو )
